نشرة هبه حلبوني البريدية - العدد #6

صباح النهايات المحمّلة بالخيرات ♥️

وبهاليوم منكون شارفنا على انتهاء أعداد النشرة البريدية يلي كنت سعيدة بكل حرف كتبته وفعلاً كانت كل كلمة نابعة من قلبي لقلبك وحاولت شاركك أشياء بتعنيني وبتمنى تكون تركت بحياتك أثر🥰

انتهى بريد هالسنة ، بس طبعا أنا مكملة معكم 😍ومستمتعة بصحبتكم ورسائلكم وردودكم ♥️

الأسبوع الماضي حكيتلك كيف ممكن نستثمر Swot بشخصيتنا وكتابة أهدافنا بتمنى انك نفّذته لنكمل الخطوة التانية ويلي هي تقسيم أهدافنا للسنة الجديدة 🤩 ويلي رح تكون على 9 أقسام كل قسم حتكتب فيه هدف أو أكتر حسب شخصيتك واستطاعتك ولكن انتبه لاتحمّل نفسك فوق طاقتها واترك مرونة بأهدافك للتطورات والمستجدات حتى لاتصاب بالإحباط والفوضى ، والأقسام حتكون على الشكل التالي

1: المعرفة والعلم

2:العمل

3:السفر

4:العائلة

5:الصحة

6:الإبداع

7:المال

8:الشهرة

9:العلاقات

كل قسم اكتب فيه هدفك والسبب يلي دفعك تكتبه حتى يرتبط بدافع قوي تتذكره كل مابردت همتك، وممكن يكون قسم من الأقسام مابيعنيك أبداً فيك تتركه عادي ، والأهداف ممكن تبدأ من أشياء صغيرة جداً ومو بالضرورة كبيرة ((انت أدرى))

أنا بحب فكرة إنّي علّق صور لأهدافي ع باب خزانتي شوفن بعيوني بشعر بسعادة وحافز أكبر اني اسعى وحققهم ، اذا بدك انت كمان استخدم هالطريقة أكيد رح تفيدك، وبالنهاية مالنا غير السعي والتوكّل على الله والإيمان والثقة فيه بأنه دايما رح يختار النا الأفضل في الزمان والمكان المناسبين ، اسعى واترك النتيجة لرب العباد فإنه لا يأتي إلا بالخير ♥️وهلأ رح اتركك مع فنجان القهوة واتمنالك يوم سعيد ،واذا عندك أي استفسار تواصل معي ع الخاص بالانستغرام♥️