نشرة هبه حلبوني البريدية - العدد #5

صباح الخير والسعادة لحياتك

كيفك….بعرف انه بهالفترة انت مضغوط سواءً بدراسة وللا تراكم معمات بالشغل أو حتى ضغط أفكار وهالشي طبيعي جداً،المهم تعرف انه هالوقت رح يمر بكل مايحمل، وإن شاء الله السنة الجديدة تحملك كل الخير واليُسر والرضا، ولتكون هيك حبيت نخطط سوا لأهدافنا بشكل مريح ومثمر وبدون ضغط……جاهز؟!! يلاااا✌🏻

بدراستي لإدارة المشاريع تعرّفت ع تحليل swot يلي رح يخلينا نقيّم نقاط قوة وضعف المشروع ونحدد الفرص والتهديدات اله….طيب شو دخلنا نحنا بهالكلام؟!  رح قلك ☺️ رح ابدأ من نفسي واكتب

اكتر 3 نقاط قوة موجودة بشخصيتي لاستثمرها بأهداف السنة الجديدة ((ممكن صفة ممكن شهادة ممكن مهارة ، اي شي بتتميّز فيه )) هالشّي

وبعدا اكتر 3 نقاط ضعف (( مثلاً أنا صارت اللغة الانكليزية عندي ضعيفة بعد ما جيت ع تركيا  ))انت ع شو رح تركز من نقاط ضعفك؟ حتهتم بصحتك أكتر ؟!

ومنجي للنقطة التالتة الفرص ويلي رح تكسبها من استثمار نقط قوتك، يعني كمان رح تكتب 3 فرص((مثلاً المهارة أو مجالك التعليمي أو العملي أو موهبتك رح تقدر تحقق من خلالها أهدافك))

وأخيراً 3 تهديدات بناءً على نقط ضعفك (( مثلاً أنا ممكن اخسر فرصة كبيرة اذا مااهتميت باللغة الانكليزية …)) 

هالشي رح يكون تمهيد وأساس لنحدد أهداف واقعية وقابلة للتطبيق مو أحلام عبثية، وتذكّر انه نجاحك مو قائم على كتابة أهدافك… أبدااااا . ولكن هي طريقة للتنظيم والتركيز اكتر

اذا عندك مقترحات تانية نقدر نبني عليها اهدافنا ياريت تشاركني ياها ع رسائل انستغرام ، ولمّا تطبّق التمرين بعتلي تم 😉 واذا عندك اي سؤال بيسعدني جاوبك عليه 

وهلأ بدّي ودّعك واتمنالك نهار مليئ بالرضا والسعادة والمفاجآت الجميلة ♥️