نشرة هبه حلبوني البريدية - العدد #4

صباح الخير أيُّها العالم .. أنا إنسانٌ طيّب

كيفك اليوم، صبّحت على وجهك اللطيف بالمراية؟معقول نسيت أهم حدا! لسا معك وقت 🤍

أنا كتير سعيدة بتفريغ مشاعر وأفكار هون بالنشرة لفيد واستفيد وأكيد انت هيك لأنك مالغيت اشتراكك 😉 ولهيك عندي كتير أشياء احكي عنها معك ونتناقش فيها،من يومين بدأت بقراءة كتاب ل د.محمد طه(لاء بطعم الفلامينكو)الكتاب أكثر من رائع والفكرة الأولى يلي انصدمت منها هي الآتية

عادةً وبشكل طبيعي ردود أفعالنا تجاه الناس والتصرفات والأشياء بتكون مخزنة بذاكرتنا من المحيط أو العائلة أو التجربة الشخصية فبناءً عليها منتصرف،لحد هون عادي…بس اللي مو عادي أنه نحنا عنا ولاء خفي لأهلنا ومعتقداتهم فمنتصرف متلهم تماماً لنحصل ع نفس النتيجة لأنو داخلنا بيقول نحنا مامنستحق أكتر نحنا بدنا حياة متل حياتهم(بسبب الولاء) أو منتصرف عكس تصرفاتهم تماماً ك رد فعل عكسي عن حياتهم وانه نحنا أبدااا ما بدنا حياة بتشبه حياتهم، وهالشي عم يصير للأسف بدون وعي وتفكير

فمثلاً بتلاقي علاقات فاشلة،اخفاق متكرر،شعور بعدم الاستحقاق،ايدين مربّطة…..لهالسبب

ماعم نوعى انه نحنا أشخاص متفرّدة بتجربتنا بعلاقاتنا بحياتنا بعملنا وقادرين نكتب القصة متل ما بدنا،طيب كيف بدنا نطلع من هالدوامة؟!والصبية تنجح بزواجا عكس أمها والشب ينجح بعمله عكس ابوه (لأنه هالولاء الخفي عم تتوارثه الأجيال متل الميراث المالي والعقاري😁اذا نوجد)الحل هو الوعي 

صدقاً أنا نصدمت من المعلومة لأنو عشتا بحياتي وفعلاً في قصص عم تتكرر عبر الأجيال، وحبيت انقلك المعلومة لتقول ((لاء)) أنا مابدي عيش تجربة حدا بدي كون أنا ، وبدي وقف هي الحلقة المستمرة كرمالي وكرمال ولادي وولادهم والأجيال بعدهم..

ياترى مريت بهيك حالة؟أو شفتا عند حدا بتعرفه؟بتمنى تناقشني ع رسائل الانستغرام بحسابي،وبتمنى تبدأ تكتب قصتك المتفرّدة👌🏻وبتمنالك أسبوع حافل بالانجازات والمشاعر الجميلة🤍