تخيل معايا كده إن الـ team عمل app جديد أو تحديث جديد، وحد من التيم جربه وقدر يستخدمه بكل سهولة وخلص الـ process في دقيقتين!
لكن لما جه حد من بره التيم يستخدم الـ app وقف في كذا خطوة واحتاج فيها مساعدة، هل نقدر نقول على الـ app بالشكل ده إنه سهل الاستخدام ولا لا؟
عشان تقدر تجاوب على سؤال هو سهل الاستخدام ولا لا؟ لازم تعرف الأول
ودلوقتي خلينا ناخد لفة صغيرة في معنى الـ Usability وازاي بنقدر نحكم على الـ product بسهولة الاستخدام.
كلمة Usability معناها هو سهولة الاستخدام، لكن معيار ISO 9241-11 يقدم مفهوم أدق للمعنى ده. ة
هو قالك إن الـ Usability مرتبطة بقدرة مستخدمين محددين على تحقيق أهداف محددة بفاعلية وكفاءة، داخل سياق استخدام محدد.
تعالى بقى معايا نفكك التعريف ده مع بعض.
أول حاجة وهي الفاعلية..
Effectiveness: هل المستخدم حقق هدفه؟
هل الـ process مشيت بطريقة صحيحة للأخر؟
هل المستخدم قدر ينهى الـ process بتاعته؟ ويوصله رسالة تأكيد وإن الـ process بتاعته تمت؟
هديك مثال بسيط:
لو عندك مستخدم عاوز يسجل حجز هل قدر يفهم الواجهة ووصل للشاشة اللي هيحجز فيها؟ هل قدر يحجز ميعاد؟ وهل الحجز تم؟ المستخدم لازم يفهم إن الـ process تمت هل فيه رسالة واضحة بكده؟
عشان نقدر نحدد الفاعلية في المنتج لازم نحدد.. هل المهمة تمت؟ نحدد دقة النتيجة؟ وإيه هي الأخطاء المؤثرة؟ ومقدار المساعدة المطلوبة للمستخدمين؟
تاني حاجة وهي الكفاءة..
Efficiency: الـ process محتاجة مجهود قد إيه؟
الكفاءة بتحدد لك المجهود اللي المستخدم بيبذله عشان يتم المهمة بتاعته..
يعني اخد وقت قد إيه عشان يخلص الـ process؟ هل كان فيه أخطاء وهو شغال؟ هل رجع بشكل متكرر لخطوة معينة؟ هل رجع وحط البيانات أكتر من مرة؟ ومقدار المجهود الذهني والبدني اللي المستخدم بيبذله؟
كل دي عوامل تقدر تحددلي مدى كفاءة المنتج أو الـ Usability
تالت عنصر في التعريف وهو..
Satisfaction: المستخدم شايف التجربة إزاي؟
هل المستخدم راضي عن التجربة ولا لا؟
وده ميمنعش إنه ممكن يكون راضي عن التجربة مع إنه وقع في اخطاء وعاد خطوات أكتر من مرة..
عشان كده مهم واحنا بنقييم نقدر نحدد كلام الـ user وفي نفس الوقت نشوف هو مشي ازاي في الـ process دي؟
عشان نقدر نحدد الـ Usability في المنتج لازم نحدد المنتج ده..
سهل لمين؟ وفي أي سياق؟
يعني لو افترضنا إن المنتج هو تطبيق أو dashboard لمخزن بضاعة.. يقدر يستخدمه موظف قديم وعارف النظام وشغال على pc ويقدر يستخدمه موظف تاني جديد من تليفونه وهو بيتحرك..
السهولة هنا هتكون عند مين؟ مين هيكون النظام أسهل عليه في الاستخدام؟ ومين ممكن يواجه صعوبة أكبر في فهمه والتعامل معاه؟
هي دي فكرة الـ Usability..
مين المستخدمين؟ إيه أهدافهم؟ المهام اللي هيعملوها؟ الأجهزة اللي هيستخدموها؟ البيئة المادية والاجتماعية؟ إيه الموارد المتاحة؟ وإيه هي القيود المفروضة عليهم؟
عشان كده جملة سهل الاستخدام بس هي جملة ناقصة لكن الجملة الصح اللي لازم تستخدمها هي..
هل المستخدم المستهدف يقدر يحقق هدفه بفاعلية وكفاءة ورضا في السياق الفعلي للاستخدام؟
لكن ملاحظة بسيطة:
تحقيقك للـ Usability مش معناه إنك حققت تجربة المستخدم كلها بنجاح، يعني مش معنى إن المستخدم خلص الـ process بسهولة إنه معندوش مخاوف تتعلق بالخصوصية أو الثقة بالـ Product.
الـ Usability مش معناها إن المستخدم خلاص حب التصميم ده مقياس محدد بيقيس جزء من التصميم من خلالص نجاح المستخدم والمجهود اللي بيبذله ورضاه عن التجربة.
ولو حاسس إنك استفدت إشترك في النشرة
لو حابب تتابع المسار الجديد وتوصلك الأعداد مباشرة:
https://gohodhod.com/@digital-products-newsletter
ولو وصلت لك الرسالة من صديق، اشترك علشان تتابع باقي السلسلة من البداية.
التعليقات