لاتلبس ثوب موب ثوبك 👗

صباح الخير لقارئ النشرة الفذَّ 

جايتكم بموضوع رهيب مافي أحد سبقني عليه لكن بعدي يمكن كثييير😉

فنون المحتوى بحرررررر ، لكن قبل نتكلم فيها بنوضح نقطة التنوع بالمحتوى 

تنويّه :كل نوع يخدم مجال وهدف مُعين مثل المكتوب والمرئي والمسموع وأشكالها مثل المقالات والانفوجرافيك والبودكاست..

فالفنون تميل بشكل أكبر للأسلوب الشخصي اللي تتمتع فيه الشخصية "كاتبة/صانعة المحتوى" فكل شخصية هنا لها دور مختلف بإظهار الفن بمحتواها من خلال أسلوبها، وهالشيء هو اللي يميِّزها في إيصال فكرتها  اما بطريقة رسمية ولا إبداعية 

وهذا هو موضوعنا لليوم ( الفن السسسساخر) 😎✍🏻 

ومثل ماقلت ؛ كل فن يناسب شخصية مُعينة تظهر بسجيتها وطريقتها بدون لا تنميق ولا تكلف -بالعفوية والبساطة والحقيقة-

لأن الشخص لما يلبس ثوب مو له👀

يوضح عليه حتى لو من خلف الشاشة تلاقي أنك ماتقبلته مثل غيره وهذه أشوفها موهبة 

فن السخرية من الفنون الرهيبة واللي تميل للإبداع والهزل أكثر، طيب ياسهام كيف يكون؟ ⤵️

▫️من خلال نشر مقاطع الميمز المشهورة،

▫️كتابة عبارات تصف الحالة أو الشعور لموضوع معين بطريقة فكاهية سواءً بالكتابة أو بالصوت

▫️النقد بأسلوب السخرية المقبولة 

وأحيانًا هالفن يكون أسلوب حياة الشخص فعلًا! يعني يقول السالفة أو يكتبها كمحتوى ويشوف أنه عادي وغير مُضحك لكن كمية القَبول اللي تجيه ماهي عادية 

وهنا نقطة الظهور الحقيقي وانعكاس الشخصية كما هي👌🏻

وأيضًا فيه محتوى نقدر نسميه (الكوميديا السوداء) هنا يظهر فيه المحتوى بالهزل الجدي، مثلًا: ⤵️

▫️يضحك على أحزانه

▫️يناقض أفكاره بطريقة فكاهية لكنها تصف الواقع المرير

وهالفن ممتع بشكل كبير لأنه يصف شجاعة الإنسان في تقبل حياته بضحكة والحلو الموضوع إنه بيلاقي شخصيات كثير تعيش نفس واقعه وهالشيء يخليه يطلع من الضغط أو الحزن بطريقة انا مو لحالي

وهذه ميزة السوشل ميديا تعرف وقتها أنك مو مستثنى من الايجابية والجماليات الحياتية لكن هي فترة وتعدي 

(لااا ماتعيطشش اجممممد)🤣

فالفنون كثيرة مثل ما قلت  المهم أنك قبل تحدد الفن:

▫️تحدد هدفك تعليمي ولا مُسلي

▫️رسالتك اللي ودك توصلها من هالهدف

▫️جمهورك اللي بيتقبل هالرسالة منك

▫️المنصة اللي بتخدم توجهك

والأهم أنك تركز على القصة وتطرحها بشكل جيد وممتع بعيد عن الجرأة الغير مقبولة أو اللي فيها تعدي على الآخرين ومسّ القيم والأخلاق ✋🏻

طيب جاك العميل وقال سلَّمك الله أبي منك تكتبين لي محتوى إعلاني ولكن بأسلوب ساخر 👀

"أهرررررب على فيييييين ؟؟؟ أدخل من عُئب الباب" ندري أنه صوتك الداخلي لكن بنعلمك كيف تحبكها بفنّ😎

أول شيء قول له ليش تبي الإعلان ساخر ووش اللي ناوي عليه؟

١- الهدف الرئيسي ⤴️

هالسؤال بيفتح آفااق لك وللعميل وبيجاوب جواب هو ما كان يعرفه أو فكّر فيه قبل، يعني بيصبّ كل شيء لك

واسأل كيف تبغاه بطريقة القصة ولا واضح من البداية؟

٢- نوع المحتوى وأسلوبه ⤴️

وأطلب منه اذا عنده محتوى أعجبه من أحد منافسينه يعطيك إياه عشان توصل لتطلعاته

٣- توضيح الرغبة والنتيجة المرجوَّة ⤴️

وقبل الأخير قول له المحتوى هذا بيكون صوتي ولا مكتوب فقط بمعنى فيه تعليق صوتي ولا بدون + فيديو ولا صور؟

٤- شكل إظهار المحتوى ⤴️

لأن لو فيه تعليق صوتي فأنت هنا لو كان ما بعد اختار له شخص! > يفضَّل أنك تساعده بالبحث عليه عشان تتوافق طبقة صوته مع محتواك إذا صوته بدون شيء مُضحك ولا تحتاج سخرية بصوت فخم ترا يفرق 🙅🏻‍♀️ 

وإذا كان بدون صوت هنا لازم تنتبه للمحتوى المكتوب أنه يوصل الفكرة وتختار مفردات واضحة ومفهومة 

لأن مثلك خابر ،، الذبّات لاتكررت تموت فأنت ماتبي تموّت عليه الإعلان!

وأخيرًا قول له وش تتوقع من العمل هذا؟

٥- الرؤية لهذا العمل والتطلعات ⤴️

في النهاية نصيحتنا لك كاتبنا المبدع أنت تعكس نفسك وتربيتك، لا تعتقد أنك خلف شاشة يعني الموضوع بسيط وعادي! لااا..مهم تكون مُدرك لأثرك الباقي ولضميرك الحي لقبولك لذاتك أولًا.. فإذا الناس ماتعرفك أنت ترا بتخجل من نفسك إذا خرجت عن قيمك ومبادئك 🤝🏻

تبي تعزم أحد لنشرة 📬؟

نشرة صـوت الـسـوق البريدية | هدهد

https://gohodhod.com/@VoMkt1