بداية الخبرة تجربة

يوووووم الربوووووع تزين الطبوووووع وصوت السوق معاك بالموووووضوع

نأخذك على السريع في موقف مر عليك أكيد -بشكلٍ أو بأخر -سواءً في القريب ولَّا البعيد🤝🏼

تخيل أنك ماشي بطريقك وصادفت محل مسوي مسابقة على جوال آيفون ١٦ ووااااحد بس 👀

طالعت لجوالك وتأملته شوي ..

الكاميرا ؟كأنها من زمن الأبيض والأسود

 الصوت ؟بالقوة تسمعه

وهذا غير التحديثات اللي قالت لك مع السلامة وبطلت تنزل على جهازك وصار يعلق أكثر من أنه يشتغل ومشكلتك مع الشاحن قصة درامية لحالها

رجعت تطالع مرة ثانية بالمحل وشفت الزحمة، وصوتك الداخلي يقولك وبسخرية يعني بين كل هالناسسسس بتفوز ؟! ولا بعد جاي متأخر! 🤣 توكل على الله ورح لطريقك بس وخل عنك اختبارات الحظ

بس جاك صوتك الملهم والمُنقذ 😎

وقال لك مين يدري؟ لعل ربي كاتبها لك؛ رح وقف مع الجماعة وإن كان من نصيبك الحمدلله وإذا لا تراك ما خسرت شيء ...

اتجهت للمحل واستقبلك الموظف عند الباب وطلب منك تسحب رقم وسحبت ودخلت بين أزعااااج  الناس اللي يضحك واللي متوتر واللي يسولف واللي منفس وأنت بينهم كل شوي تطالع  بالورقة اللي معك وتتخيل أنك فزت وجاك يا مهنا ما تتمنى 

وفعلًا!..دقائق إلا وفتح المايك وبدأ يلعب المتحدث بأعصابكم مره يضحك ومره يشكر المدير🤣 ومره يطقطق ومره يسولف هذا غير طبقات الصوت اللي ترتفع وتنزللللل وقلبك يمشي تبعًا لها 

وجااااا وقت الإعلان وناداااااك، اييييه اييييه !الرقم اللي معك هو اللي كان من نصيبه الآيفون !

واللي قبلك جو ووقفوا وقت أكثر منك ما جاهم اللي جاك!

تخيل طيب لو سمعت لذاك الصوت اللي قال لك لا تروح وسلب منك حق التجربة؟🤨 

وجلست حاط يدك على خدك شهور ولا سنة ويمكن أكثر وأنت ترجي جوال أحسن من جوالك 

العبرة هنا هيّ ⤵️

طيب ليه ما تجرب تكسب مهارة؟

أو تحول مهارة عندك لمصدر دخل؟

ولا شايف كثييييييييييير دخلوا المجال قبلك وقلت بنفسك راحت علي ،، ما لي مكان ومحد بينتبه لي بين الزحمة؟ 

التجربة ثم التجربة ثم التجربة لا تستهينون فيها، جرِّب ما بتخسر شيء! 

الكثره ما تعني انعدام الفرصة إذا أنت أخذت الخطوات الأولى ، الله أعانك وسخَّر لك بس خذها 

مو شرط تكون ضمن الأوائل عشان توصل وتحقق، المحاولة والاستمرار والتعلم هم الأساس والأهم

ولايهونون المحبطين 🤣

بس انتبه تبني قرار وتأخذ خطوة على رأي وتجارب غيرك..أنت رزقك مو متعلق برزقهم عشان تعتمد على رأيهم، لك حق التجربة ولك حق الخطأ ولك حق التقييم ولو فيه مليون شخص قدامك وكلهم ناجحين خلك جسور وادخل وجرب 

بتلقى ناس تدعمك، ناس تفرح لك وناس تصفق لك بنهاية كل مطاف وبتحصل ناس تنتفع منك بشكل مختلف ! 

وفي النهايـة، الله يلهمك التجارب الرهيبة مع الشخصيات اللي يودها قلبك  

x.com