عدد ملوش لازمة..

يمكن النشرة البريدية تختلف أكتر الفترة الجاية فلو حابب تطلع أطلع.. الصراحة أنا مؤمن إن الواحد وصل لمنخفض كبير جدا في حياته.. لكن خلينا مؤمنين إن عادي بتحصل وإنك أصلا محتاج اللخبطة علشان تطلع بوصفة جديدة.. 

أصل أيه اللي مطلوب منك؟ كلمة واحدة من ربك والباقي أنت بتحدده يخدم على الكلمة دي.. فأنت غير ملزم بحاجه قصاد الناس حتى لو وقعت قصدهم.. أنت مطالب تعمل كل شيء لنفسك حتى لو عمل للمجتمع العائد بتاعه بيعود عليك فمتقولش أنا عملت لفلان وفلان أو مجتمع أو جماعة أو حزب.. أنت في الأخر بيتصب عندك في أخر اليوم الشعور بالرضا والإنجاز.

ولما بتبدأ تخرج اللي جواك للعالم وتعرف الناس العظمة اللي المفروض تخرجها علشان متدفنش معاك أنت عملت معروف لذاتك.. كتاب مت فارغا هيساعدك تفهم أهمية الموضوع وطرق تساعدك تخرج اللي جواك.. ولو فاكر إنها بتقف على بشر.. بص للعالم الإسلامي بم إنه نموذج تاريخيا قريب ودور السيدة خديجة في حياة النبي صلى الله عليه وسلم بعد موتها الموضوع مختلفش والحياة استمرت رغم أنها كانت الداعم الأكبر.. وحتى بعد موت الرسول استمرت الدنيا شوية وحتى بعد الفتنة والفوضى أستمرت الفكرة في النمو فكل شيء بيمشي مع الزمن وبيستمر فأنت وقوفك بيخسرك وقت ومجهود الأنتظار مجهد أكتر من العمل..

كنت بأخد كورس على المنتور عن الفلوس.. كانت أهم نصيحة أنك تبدأ دلوقتي وتوضح لنفسك الأمور غالبا علشان تكلفة الفرصة البديلة.. وده مفهوم لذيذ كل ما تسوف كل ما التكلفة قدام تعلى.. وفي أكتر من نصيحة تانية منها إن حظنا مش وحش ولا حاجه أحنا اللي مش رجالة.. بهزر الموضوع كله إنك مش فاهم شكل التوفيق وإن ربنا بيحميك بطرق أنت مش بتعرف تستوعبها بباب عقلك الضيق.. علشان كده محتاج تدعي اللهم إني اعوذ بك من الجهل والفقر كتير 

كل شيء في العالم مسخر لمساعدتك؟ ده شيء عجيب جدا هتلاقي مع الوقت في حياتك إن ربنا بيوظف الناس اللي حوليك توصلك لأهدافك أو مراحل في الحياة أنت مكنتش متوقعها.. فأنت خليك مؤمن إن ربك معاك وبيسندك بس أمشي ناحية الصح لأن العسر ممكن يتيسر زي اليسر.. فليه الفرهدة.. خليك حر من قيودك شوية وأتعلم وأسعى بأقصى جهدك لأن في الأخر ده ميدان بذل وعطاء فهيا بنا.. والصراحة عايز أكمل بس حاسس إن كترت عليك فسلام