كنت على حق يا صديقي الحياة لحظة

على عكس المتوقع أجد نفسي أكتب.. لكن الحقيقة دي مش طريقتي والموضوع ده مهم ألا وهو

القبيلة.. والمبادر

طبيعتك ككائن بشري غريزة الأنتماء دائما بتبقى شغالة يمكن علشان كده بنحب حركات المقاومة الشعبية لأننا بنحن لوجود تجمع بشري يجمعنا.. وده بتلاقي في ناس كتير عامة اللي شغال وفرحان بالشغل لأنه شايفهم قبيلة اللي عنده صحاب ودائما حوليه وسموا نفسهم العصابة.. أو حتى الأحزاب السياسية والألعاب الجماعية.. كلهم فيهم سمت القبيلة الأساسية القدرة على التواصل والمصلحة المشتركة.

يا صديقي أنه تأثير اللحظة

ناس كتير أوي بتتكلم عن الوعي والمعنى لكن ماذا عن التوقف اللحظة اللي بنبص فيها من فوق ولفوق بردو أيوه يا رفيق النظر للسماء حل عظيم.. ساعات النظرة بتكون معجزة وقادرة تخليك تاخد ملاحظة مش شايفها وانت باصص تحتك.. فجرب تبص للسماء وتأثير ده

الحقيقة لا الحب

طول عمري بدور على الحب أنا مشخص نفسي إن ده نمط شخصيتي ويمكن علشان كده رشح ليا صديق عزيز ديوان "صريع الغواني" ولكني حاليا بقيت حاسس أنه مسكن وإن الألم اللي بيحصل من الفقد هو حقيقة يجب أستيعبها وأنها كده كده جاية.. لكن مش دي الحقيقة الوحيدة اللي بنحاول نتقبلها فخلي قلبك منفتح لأن الأساسيات اللي موجودة في عالمك أقل بكتير وأفضل بكتير من اللي متمسك بيها

الإيمان بالحلم

أنا بحب أوي فترة التيسير بحس إن الموضوع سحري لكن ساعات بحس أنه بياخدني لمكان بعيد عن اللي حلمت بي فبجدف عكس التيار وأدمر كل حاجه.. لأني معملتش تقدير موقف وحطيت نفسي في "خانة اليك" زي ما بيقولوا الخانة "المحبوسة" وزي الغرقان بضرب كل اللي حواليا.. وزي ما توقعت يا رفيق أنا فقدت إيماني في الوقت ده رغم إن ده الوقت اللي المفروض تبص في للسماء وتحسب هتتصرف إزاي أو على الأقل تاخد نفسك قبل ما تتحرك.

لكن ما مغزى الحياة؟

الحقيقة إنك هتقع في توهة كبيرة جدا إذا مسلمتش لمعنى من المعاني اللي حوليك.. أن بحب فكرة الأستخلاف وفكرة العبودية وفكرة المعمر.. كل دي حاجات موجودة في ثقافتنا خاصة الأسلامية وبالمناسبة العمارة فن فرعوني بردو والعبودية لله تحرر وهتفهم ده لما تعرف معنى الشرك والكفر كويس لأن للأسف لو تدبرنا حياتنا هنلقى في حاجات كتير أشركنا بيها رغم إن مذهبنا التوحيد.. وده مش تكفير لحد ولا تعميم لكن للأسف التكنولوجية قادرة تسلب عقولنا ومسلمات عندنا وتحركها بعيد عن طبيعتنا وفطرتنا

ليست غلطة الآلة 

الآلة زيها زي أي شيء في حياتنا لكن للأسف سلطة الإنسان بتخليها تسير في أتجاه مختلف فبدل ما الخورزميات معمولة تساعد الناس تتعارف على بعض لا هنحط كام حاجه تساعدنا نستحوذ على جيوب الناس وعقولهم.. لدرجة وصلتنا لتعفن العقل..

طولت عليك لكني مش بأحسن حال فأرجو الدعاء وقولي حابب نتكلم عن أيه تاني؟