قبل نبدأ ✋🏻

لاحظنا الأيام الماضية أن تواصلنا معك على البريد غير مرئي! كان بودنا نتأكد أن رسائلنا الجزلة توصل لك أكيد، لكن لا حس ولا خبر👀

تحسبنا بنقول لك ألغِ الاشتراك ولا بنلغيه بكيفنا؟

ههه لا والله نمزح معك بس عاد ودنا تتفاعل بكل نشرة نرسلها ترى الدرب ما يكتمل إلا فيك .. مشاركاتك معنا تفرق بشكل كبيــــر

مثلًا الآن متحمسين نعرف ردة فعلك على البداية وتقييمك للنشرة 🧘🏻‍♀️

— نشرتنا اليوم مهمة جدًا لكل كاتب محتوى تسويقي .. بنعلمك كيف تكتب محتوى تسويقي في الإيميل

أكيد أن البريد عندك قالب سوق حراج من كثر الرسائل التسويقية اللي تنهال عليك، فيه منها اللي أثَّر عليك وفيه منها اللي مريت وعديت عليه بدون أي تأثير

عاد أمر الله أقوى أنت كاتب وسيد الكلمة من يأثر فيك؟ 😂😎

— يلا ندخل بالعيار الثقيل؟

• ( الإيميل التسويقي )

هو واحد من الوسائل المستخدمة في التسويق لأنهم يعتقدون أن معظم الناس ببداية يومهم وخلال يومهم ويمكن على نهاية اليوم يتصفحون البريد فيكون فيه احتمال كبيــر ينتبهون لرسالتهم اللي وصلت بشكل خاص أو اللي وصلت لجميع المستفيدين

طبعًا ما فيه رسالة توصل لك إلا وفيها هدف مهم جدًا عند البائع ويضمن لك أنك بتستفيد في أحد الجوانب

مثلًا إذا بيبلغك عن منتج جديد موفرينه فهو على الأرجح بيقدم لك الفائدة قبل المنتج وإذا بيعلمك عن عرض عندهم بيقول لك أنك أنت المستفيد لأنك بتوفر!

وأنت كاتب محتوى فيه احتمال كبير ينطلب منك رسالة تسويقية على الإيميل، والعميل بيشارك معك الهدف فقط والباقي عليك " خلك ذيب "

⤵️ | بسم الله نبدأ الخطوات

• أول شيء اعرف الفئة المستهدفة مين؟

الجنس، العمر، اللغة هذي أهم الأشياء

سجلها على الورق ✅

• ثاني شيء أعرف الفائدة اللي يحتاجها المستفيد

بتوفر له وقت؟ بتوفر له مادية؟ بتحل له مشكلة صحية معينة؟

سجلها على الورق ✅

• ثالث شيء الـ CTA اتخاذ الإجراء خذه من العميل

هل العرض لأيام؟ هل الكمية محدودة؟ هل التوصيل مجاني لأول الطلبات؟ إلى آخره.

سجلها على الورق ✅

الحين كل المعلومات اللي تحتاجها وقت الكتابة صارت قدامك، نبدأ بالعنوان واللي هو مربط الفرس إذا ما كان العنوان فنان انسى نجاح الهدف

العنوان لازم يكون قوي ومختصر ويوصل رسالة يعني المستفيد بيُعجب بالعنوان وبيقرأ حاجته فيه

▫️وهذا مثال على متجر متخصص (بالفواحات)

- الفخم مثلك يحتاج فواحة وبخصم ٣٠٪؜!

تقول عني فخم؟ ومعطيني خصم! ولا أشتري؟ عيب علي 🥴✨

▫️مثال على دورة تدريبية مجانية مع دورة معينة تسجل فيها

- العالم يحتاج دماغك جهزنا لك دورة مجانية!💰

شعور العظمة أنا العالم يحتاجني؟ 😎✨

وكيف دورة مجانية! 🤯💰♥️

▫️مثال على متجر بيرفع عدد الزيارات

- كأن الحلو طول علينا؟ ❤️‍🩹

بيجيك فضول تفتح الرسالة وتكمل عشان تعرف ليش يبونك تزور المتجر، عاد إن أعجبك السبب بتزورهم ✨

— بعدها المضمون واللي هي كم عبارة توصل للمستفيد رسالتك المهم تكون (بسيطة، سهلة الفهم، قصيرة)

تتضمن صورة أو رابط لو تطلب الأمر .

لغمها إبدااااع، وطبعًا ما نتركك بدون مثال

(همتك يحتاج لها العالم ونبي نثير دماغك بالمعلومات اللي ممكن تُخرج منك مبتكر وفنان وسيد في حل المشاكل ومبدع دماغه ما ينام ! 🛰️

تقدر تسجل في أي دورة مجانًا بعد تسجيلك في دورة التسويق الإلكتروني مع المدرب ..

لمعلومات أكثر زر موقعنا الإلكتروني ..)

وهذا كان مثال مكمل لثاني مثال ذكرناه في كتابة العنوان

• وباقي النقطة الأخيرة ⌛️

— اتخاذ إجراء (CTA)

هنا العميل لو ما اقتنع ١٠٠٪؜ في المضمون؛ بيدفعه الـ CTA باتخاذ الإجراء بصورة أسرع

انتبــــه | ⚠️

العميل اليوم ذكي جدًا ويمكن صار يمل من العبارات التقليدية مثل زرنا الآن، اطلب الآن !!

يبي الإبداااااع منك، يبي يعرف منك ليش مفروض يقرر الآن عطه سبب مقنع؟ أو عبارة محفزة؟

— نكمل مثالنا اللي قبل

المقاعد محدودة ومن بينهم مقعد يستاهلك سجل قبل اكتمال العدد .. احنا والعالم بانتظارك 🌟

شايف المثال هذا؟

يعطي للمستفيد قيمة ويعزز الولاء بينكم، كلمة محدودة بتخليه أسرع في اتخاذ القرار

— وبسس لهنا انتهينا، الموضوع مو صعب لكن غلط نستسهل فيه ويفقد عناصره الأساسية بالتالي ما يحقق الأهداف المطلوبة

على الطاري ما نكتم عنك هالعلم في بوصلة الكاتب لمحتوى المتاجر تكلمنا عن الإيميل التسويقي بالتفصيل وعن غيره كثير وهذا الرابط إذا ودك تكون الكاتب العظيم

من الرابط توصل له ⤵️

ويجيك معه ملفين مجانًا ويازين طاري المجاني 🥴💰♥️

الأول - يحل عقدة التسعير

الثاني - ملف اكسل احترافي ومتكامل تضيف فيه المحتوى وتسلمه للعميل

وبالنهاية بنقول لك جعلك تقول وتطول وتنول وجعل مساعيك تثمر بين يديك، ولا تنسى فقرة تصويرك لطقوسك بقراءة نشرتنا🫣❤️‍🩹

— ودُم دُدُم دُدُم دُدُم دُمتم سااااالمين