ليش بتقاطع أهم لحظة بحلقتك؟

سلامات سلامات سلامات..

تأخرت النشرة اليوم، بس هي دايماً راح توصلك 😉

الأحد الماضي كنت خلف الكواليس بتسجيل حلقة أون لاين لبودكاستر "عميل حالي"، وكنت براقب الحلقة عن كثب.

سأل البودكاستر ضيفه سؤال "دسم"، وبعد ما خلص الضيف جوابه، سكت. ثانيتين، ثلاث، أربع.

حسّيت التوتر واضح حتى من خلف الشاشة، وشفت البودكاستر قفز (حرفياً بجسمه) يسأل سؤال آخر حتى "ينقذ" اللحظة.

بعدين لما رجعنا نسمع هذا المقطع تحديداً سوا، وقفت ووضّحت: هاي "السكتة" كانت بداية جواب أعمق.

الضيف كان عم يفكر، وما انتهى جوابه "الحقيقي".

والبودكاستر خاف من الصمت وقطعه.

والحقيقة، كثير بودكاسترز بيعملوا نفس الإشي: بيسمعوا صمت، بيحسوا إنه خطأ تقني أو "فراغ في الحلقة"،

فبيتدخلوا بسؤال جديد أو توضيح إضافي.

وبالتالي: بيقتلوا أعمق لحظة كانت جاية.

للتوضيح: الصمت مش فراغ، هو مساحة تفكير. وأغلب اللحظات المؤثرة بالحلقات صارت بعد سكتة ما حدا قاطعها.

فـ قبل حلقتك الجاية، جرّب هذا التمرين: لما تحس صمت بعد سؤالك، عدّ لثلاث قبل ما تتدخل.

هاي الثواني الثلاث بتفرّق بين جواب سطحي وجواب حقيقي.

الجلسة الاستراتيجية مساحة جيدة لو حبيت نراجع أسلوبك بالإصغاء، مش بس أسئلتك. احجز جلسة استراتيجية مخصصة.

وإذا معني حدا يشتغل معك على النظام كامل، خدماتنا على الموقع.

رنين | The Third Mic
شريكتك في بناء إرثك الصوتي
إلى أن نلتقي في فضاءات صوتية أرحب