ليه لازم متسمعش اغاني

#1كلمات الاغاني

طبعا المعازف حرام وده شىء معروف لكن لو متعرفش فهسيب رابط يثبت هذا الكلام.

الاغاني حرام لأسباب كتير بالنسبالي وأمهم الكلمات احنا بنسمع ومندمجين مع الاغاني لدرجة اننا مش بناخد بالنا اصلا احنا بنسمع ايه فلو تحاول تركز شوية في معنى الكلمات اللي بتسمعها هتندهش انك ازاي مكنتش واخد بالك من الحاجات الي ممكن توصل لكفر.

ايه!! كفر؟

اه والله زي ما سمعت كدا لكفر واضح ، بس احنا مع الموسيقى مندمجين ومش فاهمين احنا بنعمل ايه ولا بنسمع ايه خد مثال.

انا كنت من الناس اللي بسمع راب  ومندمج جدا واتأثر بالاغاني بتعتهم واتابع حياة الرابرز الشخصية واكتب راب واتعلم ازاي اعمل beat اي الموسيقى اللي هغني عليها  حرفيا كانت حياتي معاهم و الحمدلله انه تاب عليا من كل ده لان والله كنت في ضلال شديد.

من ضمن الرابرز اللي كنت متأثر بيهم جدا هو مروان بابلو اه والله هو اسمه كدا المهم من ضمن الاغاني اللي كنت بحب اسمعهاله ( لن أذكر إسمها ) أغنية كنت بحبها جدا ولما يجي حد يقولي تعرف اغاني لمروان بابلو بتكون اول الاغاني اللي برشحهاله.

هتقول دلوقتي انت مكبر الموضوع ليه مهو عادي اهو هقولك يا صحبي اتقل بس.

كان بيقول في الاغنية جملة صريحة جدا وهي "خلاص قربت أكون إله" انت مدرك انا كنت بسمع ايه ومش واخد بالي لأ وبسمعه من شاب عربي مسلم يعني المفروض فاهم هو بيقول ايه ما بالك بالأجانب بقى وتشبيه نفسهم بالإله فلازم نفكر في كل كلمة احنا بنسمعها منهم .

الكلام ده مش مقتصر على مروان بابلو بس لا تقريبا كل الرابرز كدا زي مروان موسى وهو بيقول "محدش بيحرك الدنيا دي غيري"  رابر تاني أسمه ارسينك قال "مالك انهارده وبكرا في ايدي"

في أمثلة كتير وأفزع من دي أصلا ومش في الراب بس لأ في الاغاني كلها عموما لأنك حتى لو بتسمع أغاني رومانسي المغني قاعد بيقول عيونك وشفايفك والحاجات دي فده غزل صريح ومحرم في الاسلام.

وبس كدا نكتفى بهذا القدر اليوم وإن شاء الله العدد القادم هنتكلم عن تأثير الاغاني على الحياة الشخصية وازاي بتخليها اسوء مش أحسن زي ما بيتهيألك وأنصح طبعا بسماع بود كاست وعي على اليوتيوب هسيب رابطه تحت والسلام عليكم ورحمة الله وبركاته.

شبهات وجوابها حول حرمة الغناء - إسلام ويب - مركز الفتوى

وعي 25 تجارب شخصية مع الموسيقى وآثارها علينا، وأهمية القرآن في تطهير القلب