اول مرة اتكلم عن قصتي مستعد تسمعها ؟

مساء الخير ... مساء البدايات المشرقة 

اعرفكم بنفسي اولاً انا منار مسوقة ومتخصصة تحديدا في التسويق الرقمي 

عندي خبرة لا بأس فيها بمجال العمل والشركات .. مهنيا اعتقد اني تمكنت من معرفة اهم الطرق والاساليب اللي تساعدنا نعرف نتعامل مع الزملاء والمدراء وكيف نطور انفسنا مهنيا 

وحتى كيف ما نخلي الوظيفة هي الوسيلة الوحيدة لتحقيق الدخل وكيف ممكن نبدأ بزنس خاص فينا لو عندك رأس مال او لا ...

في بدايتي في عالم التجارة الالكترونية ما بين عام ٢٠١٩ - ٢٠٢٢ بدأت ابيع منتجات الجورنال الارت جورنال تحديدا لاني كنت شغوفة فيه فتحت قناة باليوتيوب وبدأت اصور فيها journal with me وفتحت حساب انستا ايضا لنفس الغرض ... وحققت دخل لا بأس فيه كطالبة في اول سنة بالجامعة 

كنت سعيدة اني لقيت مصدر دخل يناسبني وشغوفة فيه ايضا .. وقتها تعلمت كيف اطلق الحملات الاعلانية وكيف انشى متجر وكيف اصنع المحتوى على مواقع التواصل بعد فترة كبر حسابي وكان يشمل تجاربي الشخصية ..

قفلت بزنس الجورنال وانتقلت للزراعة ( عشوائية نعم ) لكن وقتها كنت ابحث عن شغفي وما كان يهمني تحقيق دخل مستمر ... ووقتها كنت في اول كم شهر متدربة في شركة ، اشغلني هذا عن تطوير البزنس لكن ما يأست وقررت اخترع(بعد ما اخترعته اكتشفت انه موجود لكن غير شائع عندنا ) منتج جديد يناسب الزراعة وهو ال flower press ووفرت اصيص فخاري بأشكال رهيبة ومتنوعة سويت جدول للزراعة عشان ابيعة كمنتج رقمي  ، سويت شعار وstamp جاي خصيصا من امريكا وجهزت الكراتين وادوات التغليف .. لكن لسبب ما ما قدرت اكمل في هذا المشروع لان شغفي انتهى والزراعة متعبة والعناية فيها تحتاج شخص متفرغ وتعلمت من هالتجربة ان الحماس لحظة مؤقتة وان المشاريع ما تبدأ بمثل هذي الطريقة لازم ندرس السوق ونبني الجمهور المهتم ما ندخل نفسنا بالحيط وبالاخير نكتشف انها كانت لحظة حماس وشغف مؤقت لا اكثر ! 

ثم بعدها وقفت اي مشاريع وقررت اشتغل على تطوري المهني ترقيت بمكان عملي ودخلت في حياة الادارة الصعبة (ممتعة احيانا ) اقدر اقول انها كانت نقلة في حياتي لاني تعلمت كيف ادير ميزانية ضخمة وكيف استقطب الموظفين المناسبين وكيف اتعامل معهم تعلمت مهارة التفويض بعد ما كنت اسوي كل شيء بنفسي كيف اوزع المهام وكيف اتعامل مع مشاكل الموظفين الخ ، لكن اللي ما حسبت حسابة اني ارهقت نفسي في بيـئة لا تستحق وفي ادارة جاحدة عشان كذا تأثرت نفسيا ودخلت في نوبات قلق وتوتر لا يمكن السيطرة عليها ، ،بعدها اكيد ( استقلت ) وقررت ارتاح وما افكر بوظيفة ولا شغل كنت بركز على نفسيتي وكيف ممكن اتغلب عن كل المشاكل اللي سببتها لي بيئة العمل هذه .. ثم بدأت من جديد في مشوار الفريلانس وبدأت في اكثر مشروع كنت قد ركنته على جنب فترة طويلة الا وهو تصوير الugc حياتي بعده تغيرت كليا عرفت وايقنت انه الشغل اللي يناسبني ١٠٠٪ لاني احب التصوير كهواية والتسويق كتخصص لما جمعتهم مع بعض طلع ارررهب كومبو .. حققت عوائد مالية ممتازة وعرفت كيف اقدر اجذب الشركات الكبيرة تشتغل معاي وبشكل مستمر وتمشي لي راتب شهري .. عشان كذا في النشرات القادمة بشارككم خطوات انشاء برسونال براند في مجال اليوجيسي وكيف نسوي ملف اعمال قوي ، وايش اهم الادوات اللي تساعدك تتميزين في هذا المجال 

واكيد هالنشرة ما راح تكون بس عن مجال اليوجيسي بنتكلم عن الحياة المهنية وعن طرق الدخل الاخرى مثل المنتجات الرقمية وغيرها .. هدفي في نهاية هالسنة اساعد اكثر من ٤٠+  شخص مبدع واعلمهم كيف يطلعون من مهنتهم - حرفتهم مصدر دخل ممتاز 

هذا غير الخدمات الاخرى اللي بعلن عنها قريبا بس تجهز ! 

شكرا لوقتكم ... القاكم في نشرات بريدية قادمة