ليه العميل يتردد يشتري من متجر مبتدئ؟

خلنا نكون صريحين شوي.. الناس تحب تدعم المتاجر الصغيرة، بس ما تحب تحط نفسها في موقف صعب. العميل ما يعرفك، وما عنده سبب يثق فيك من أول زيارة. هو مو ضدك، بس ببساطة.. ما يبي يضيع حقه.

المخاوف كثيرة:

• "وش يضمن لي إن طلبي يوصل؟"
• "طيب لو طلع فيه مشكلة؟ بيردون علي؟"
• "وش يضمن إن المتجر ما يقفل بكرا؟"

وهذي مخاوف حقيقية. واللي راح يفرق إنك تعرف كيف تطمّن العميل وتبني هالثقة شوي شوي.

طيب.. كيف تبين متجرك كبراند حتى لو توك بادئ؟

1. بين إنك مرتب

أول شيء يشوفه العميل هو شكل المتجر: هل التصميم واضح؟ هل طريقة الطلب سهلة؟ هل فيه صور نظيفة ووصف مفهوم؟ هذي كلها تعطي انطباع إنك مرتب، وإنك ناوي تكمل، مو تجربة مؤقتة.

الشكل المحترم، والتجربة السهلة، يخلون العميل يحس إن المتجر "ما راح يختفي بكرة".

2. لا تتكلم كأنك شركة كبيرة

بالعكس، خلك صادق، ووضح للناس إنك مشروع صغير بس جاد. قل لهم ليه بدأت، وش هدفك، واش تبغى تقدم لهم. هالكلام البسيط والصادق يبني شعور إن فيه شخص حقيقي ورا المتجر، مو بس واجهة إلكترونية.

3. وضّح التفاصيل

الناس تخاف من المجهول. فكل ما كنت واضح أكثر، ارتاح العميل أكثر:

• متى يوصل الطلب؟
• وش سياسة الاسترجاع؟
• كيف يتواصل معك؟
• هل فيه ضمان؟
• كم تكاليف الشحن؟

الوضوح = أمان والأمان = ثقة

4. اشتغل على التجربة قبل التسويق

لا تبدأ تصرف على حملات وأنت ما جهزت متجرك. أضبط الواجهة، رتّب المنتجات، خل الخطوات واضحة، سو تجربة شراء حقيقية. لأن العميل لو دخل من إعلان، ولقى تجربة مشوشة أو ناقصة، بيروح وما يرجع.

تجربة المستخدم الجيدة، والتصميم الواضح، تقول للعميل: "لا تخاف حنا نعرف وش نسوي".

5. خلك موجود

حساباتك في السوشال ميديا لازم تكون حية، تتكلم، ترد، تشرح. العميل ما راح يثق في متجر إذا شاف آخر منشور له قبل شهر، أو ما فيه تفاعل. الوجود الدائم يرسل رسالة بسيطة: "حنا مستمرين، تقدر تعتمد علينا."

الخلاصة:

الناس ما تخاف من المتجر الصغير، الناس تخاف تشتري من متجر ما تطمّن له.

ومن أول يوم لك، تقدر تبدأ تبني الثقة.. بساطة، وصدق، وتفاصيل واضحة. مو لازم تكون "كبير"، بس لازم تكون جدي، وتبين إنك ناوي تطول.