بين البساطة والاحتراف: كيف تبدأ مشروعك بذكاء؟

كثير يكلمني ويقول:

"ودي أبدأ متجري كبراند محترم… بس ما أبي أضيع وقتي على تفاصيل شكلية أو أشياء مالها داعي"

وأتفهم هذا الشعور تمامًا. أنت تبغى تبدأ صح، بس ما تبغى تعلّق ولا تبالغ.

السؤال الحقيقي هو: هل أبدأ بشكل بسيط؟ ولا لازم أطلع قدام الناس كبراند متكامل؟

الجواب بالنسبة لي: تقدر تبدأ بسيط… بس لا تبدأ عشوائي.

كيف يعني "بسيط بس مو عشوائي"؟

يعني تبدأ بتصميم وهويّة تعبر عنك، حتى لو كانت عناصرها قليلة. ما تحتاج تصرف كثير، ولا تسوي كل شيء من أول يوم، بس لازم الزائر لما يدخل متجرك يحس إن فيه ترتيب… فيه فِكر.

3 أشياء تفرق معك من البداية:

1. الوضوح

ألوان متناسقة، خط واضح، صور مرتبة. مو شرط لوجو فاخر ولا هوية كاملة، لكن خلك واضح. الزائر إذا حس إنك مرتب، بيرتاح أكثر.

2. الثقة

صفحات مثل "من نحن"، "الأسئلة الشائعة"، "سياسة الاسترجاع" هذي ممكن تكون سبب إنه يكمل الطلب. ترى كثير يطلعون من صفحة الدفع لأنهم ما لقوا إجابة على سؤال بسيط.

3. نبرة الصوت

كلامك في المتجر له تأثير كبير. هل هو رسمي؟ شبابي؟ بسيط؟ اختر نبرة وحدة وخلك ثابت فيها، في وصف المنتج، في الردود، في كل مكان.

طيب متى أبدأ أطور؟

إذا بدأت بشكل بسيط بس مرتب، بيكون عندك مساحة تطور كل شيء لاحقًا: تحدث الهوية، تضيف أقسام، تحسن التجربة، تضيف محتوى… لكن لو بدأت عشوائي، بيصير كل تعديل لاحق كأنه "ترقيع".

نقطة أخيرة:

البراند مو بس شكل. هو إحساس ياخذه الزائر من أول زيارة. وهذا الإحساس تقدر تصنعه… حتى لو منتجك واحد، وحتى لو توك بادي.

خلاصة النشرة:

لا تضغط على نفسك، بس لا تبدأ بداية تندم عليها. ابدأ ببساطة، بس خلك ذكي، واشتغل على الأساس الصح.

وصدقني، الشكل البسيط اللي فيه وعي… أقوى من تصميم فاخر بس عشوائي.