أسهل منتج رقمي ممكن تبيعه (كسبت مئات الدولارات)

من كام سنة كنت أبحث في كل أنحاء الانترنت على طريقة أزوّد دخلي بيها بأقل مجهود ممكن

وبعد ما اتسحلت في خرافات كتير وصلت للحقيقة البسيطة دي : "لازم تبيع منتج أو خدمة"

 بالنسبة للخدمة فهي هتحتاج وقت عشان تبقى كويس فيها، في حين أن المنتج هيحتاج رأس مال ولو صغير عشان تبدأ.

من هنا قعدت ادور على حاجة مش محتاجة رأس مال ولا خبرة طويلة،

لحد ما اتكعبلت في كانفا تمبلتس (Canva templates)

الفكرة باختصار عبارة عن انك بتعمل تصميمات على كانفا، وتحطهم كلهم في ملف واحد وتبيعهم للي محتاج التصميمات دي

ممكن يبقى صانع محتوى بيحتاج بوستات سوشيال ميديا

ممكن يبقى مدرب عايز ستوريز للانستجرام عنده 

ممكن اي حد محتاج تصميم احترافي

بدل ما يجيب مصمم ياخد منه 50-100 دولار في كل تصميم

هيشتري منك ملف فيه 50 ديزاين ب 30-40 دولار ويوفر وقت ومجهود وفلوس ويطلع تصميمات احترافية بدون ما يضطر يتعلم اي حاجة عن التصميم

هتقولي 

- طب ليه ميستعملش تمبلتس كانفا المجانية أو حتى المدفوعة هتبقى ارخص بكتير ليه يروح يشتري تمبلت؟

هقولك:

  كانفا تمبلتس عشوائية تماما كل واحد منهم ستايل مختلف 

هتلاقي

- برزنتيشن بألوان وستايل معين

- سوشيال ميديا بوست بألوان وستايل مختلف تماما 

- غلاف كتاب الكتروني بألوان وستايل ثالث

وهكذا

قوالب كانفا (Canva Templates)

وزي ما احنا عارفين ان اي حد محترف لازم يستعمل نفس الستايل بنفس الهوية البصرية في كل حسابات السوشيال ميديا 

مين بقى اللي هيعمل تمبلتس بأنواع مختلفة بنفس الستايل والالوان ، عددها كبير نسبيا وجاهزة للتعديل والاستعمال في دقيقتين؟ انت طبعا 

هنا يأتي دورك 

لما تعمل تمبلتس احترافية ، شكلها حلو، وعملية، وسهلة الاستعمال ورخيصة نسبيا ف انت هنا بتقدم حاجة هتوفر وقت ومجهود وبالتالي هيتدفع فيها فلوس

المهم قريت كذا بوست عن الموضوع وشوفت كام فيديو على يوتيوب و كنت شايفه مشروع جانبي لطيف لكن متخيلتش أن فيه فرص بالحجم ده

اتحمست وفتحت كانفا، خدت كورس صغير كده في الأساسيات وابتديت احاول اعمل منتج يبيع

مكنش عندي اي فكرة ، ايه اللي ممكن يبيع وايه اللي الناس بتحبه ومستعدة تدفع فيه فلوس

بدأت في الإرتجال ونفذت شوية أفكار سيئة جدا ومتخيل أنها هتبيع لوحدها، 

مرة اعمل Instagram puzzle templates ملوش أي استعمال

بعدها ebook template (كتاب إلكتروني) بتصميم عشوائي تماما

هالوين تمبلتس شكلها حلو وملهاش أي فايدة 

لدرجة خلفيات ديسكتوب فيها مكان للايكونز "تخيلت أنها فكرة حلوة"

 أول 5-7 منتجات كانو غاية في السوء 

طبعا خدت مني وقت ومجهود(4-6 شهور)، ومحققتش أي نجاح من أي نوع.

مكنتش فاهم أن الموضوع بيزنس زي اي بيزنس محتاجله خطة 

أو على الأقل محتاج ابقى عارف انا بعمل ايه.

بدأت أذاكر تاني واحاول افهم المشكلة فين

بدأت ادخل مواقع زي كرييتف ماركت , و إتسي  وأتفرج على المنتجات الناجحة اللي بتبيع,  

حاولت أقلدهم وأعمل منتجات شبه المنتجات الناجحة دي, والنتيجة كانت نسخة رديئة من المنتجات الموجودة وبسعر قريب منها, ف كان الفشل الذريع هو مصيرها طبعا

المهم، بعد معاناة قررت إني مينفعش اكمل بنفس الطريقة ومحتاج مساعدة

 قررت أشتري كورس من كريتور اجنبية نجحت في البيزنس ده وكانت بتكسب منه حوالي 3000 دولار شهريا -عرفت الموضوع منها اصلا-

صاحبة The side blogger اسمها Maliha للي حابب تفاصيل اكثر 

 اشتريت الكورس على أمل أنه الوصفة السحرية للنجاح 

 كان مفيد بكل صراحة وعرفني شوية أخطاء كنت بعملها

لكنه مقدمش إجابة واضحة على الأسئلة بتاعتي، المفروض اصمم ايه على كانفا؟

 اقلد منتجات موجودة؟ ولا اخترع منتجات جديدة؟ وازاي أعرف أن المنتج بتاعي جيد أو لا؟

مفيش أى مسار واضح للنجاح, أنا لسه بجرب وبحاول الاقي الطريق, نكمل المرة الجاية