نشرة ديم البريدية - العدد #24

أهلييييييييين 

كلنا نعرف بأن للتسويق قواعد وأساسيات 

 لكن خل اسولف لكم عن الفروقات الحقيقية بين التسويق المنطقي الرهيب والتسويق الكارثي الغير مُرضي واللي جالسه أكتشفها بطبيعة شغلي يوم بعد يوم  

التسويق المنطقي بسيط ومختصر ويحل مشاكل تستحق أن تذكر

التسويق الكارثي معقد ويصعب المهمة ومايوصلك لنتيجة مرضية  وتظل تدخل وتدور في نفس الدوامة ويكون بحد ذاته هو أساس مشاكلك اللامتناهية

____________

التسويق المنطقي  يساعدك ويوضح لك خارطة الطريق 

التسويق الكارثي يعقد عليك الوصول ويخليك تتخبط طول الوقت بمعنى تظل تندب حظك بشكل دائم وتفكر فقط كيف تزيد الوصول  

____________

التسويق المنطقي واضح وتشوف أثره بعيونك ومايحتاج أحد يقولك ليش وكيف لأنه باختصار يعطيك النتائج

التسويق الكارثي غير واضح ومغبش  ونوعًا ما يخليك في تشتت والحقيقة بأن التسويق عبارة خطوات مدروسة سواء نجحت أو لا فالموضوع يعتمد كله على كيف تكتب خطة مدروسة وتحقق فيها ولو على الأقل  جزء من النتائج المكتوبة

____________

التسويق المنطقي واضح وصريح مايحتاج فيه لف ودوران يعلمك كيف إن المصداقية والوضوح سر الوصول ولو كان بعد وقت طويل !

التسويق الكارثي مايعرف الصدق ويتفنن كيف يكذب عليك ويخليك تعيش وهم واضح وبشكل جدًا مؤلم ماتلاحظ أثره إلا بعد ماتدفع ثمنه

____________

التسويق المنطقي والرهيب إبداعي حقيقي مش يعني تصميم بوستات بالإنستقرام ترضي وتلبي المطلوب بالشكل الفعلي 

التسويق الكارثي يركز على كيف نصمم شيء رهيب ورائع وتصير الواجهة حلوة  بس النتيجة مافيه ردة فعل وخلق أثر فعلي ممكن

____________

التسويق المنطقي الرهيب يسرق الأفكار زي الفنان بس يضع بصمته الخاصة سواء اعجبت الكل أو لا المهم انه يبدع بمجاله ويكون مقتنع باللي قاعد يسويه

التسويق الكارثي مايعلمك شيء مفيد لأنه مايعرف يقتبس ويستلهم الأفكار بشكل كبير ومايؤمن بقاعدة أسرق كالفنان ! بل يؤمن بقاعدة خلق فكرة جديدة كل مرة وهذا شيء جدًا صعب ومرهق ويؤخر عملية النمو عندك دائمًا وابدًا 

وفي النهاية أتمنى تكون هذي النشرة مُلهمة بالنسبة لك والأهم من ذلك تساعدك وتنمي من مشروعك 

شاركني رايك بالنشرة وإذا ببالك موضوعات أحكي عنها✨🤍