استهدف عميلك الجزء الثاني

المقدمة :-

النشرة اللي فاتت كلمتك عن اخطاء التسويق بالمحتوى وعرفنا يعني اي تسويق بالمحتوى ، انهارده هكلمك بالتفصيل اكتر عن افكار المحتوى وازاي تجيب افكار للمحتوى بخطوات عملية مفيدة وفعالة .

افهم تسويق :-

التسويق بكل بساطة انك تخلق رابط بين خدمتك وبين عميلك اللي انت مستهدفه ،فضروري لازم تعرف عميلك بيفكر ازاي ومحتاج اي وشوف خدمتك اللي بتقدمها وشوف ازاي هتقدر تخلق الرابط ده .

افهم عميلك :-

علشان تفهم عميلك وتوصل لرابط بين عميلك وبين الخدمة اللي بتقدمها لازم تفهم 3 حجات عن عميلك :-

معتقداته + المشاكل اللي بتقابله + اي اللي محتاجه منك 

المعتقدات :- 

هنا عارف انك هتقول هو انا اعرف معتقداته ازاي انا اصلا مش عارف اوصله !!! 

بكل بساطه اللي اقصده هنا شوف عميلك في اي شريحة في المجتمع ، مستوى تعليمه ، بيفكر ازاي ، بيحب اي بيكره اي وده هتعرفه من الناس اللي حواليك اللي في نفس شريحة عميلك او اللي شبهه ، ممكن بردوا تلاقيهم عندك في السوشيال ميديا . الخطوة دي مهمه علشان تعرف اصلا هتكلمه بالمحتوى بتاعك ازاي . 

المشكلات :-

لو فهمت مشكلة عميلك هتقصر الطريق على نفسك في المحتوى بتاعك ، شوف مين اكتر ناس بتحتاج لخدمتك واي اكتر مشكلة بتقابلهم واتكلم عن حلها ، اتكلم عن اي حاجه ممكن تكون غامضة للعميل ومحتاج يفهم تفاصيلها، عرف عميلك ازاي التعليق الصوتي ممكن يحلله مشاكل في البيزنس بتاعه ويخلق ربط بينه ازاي وبين جمهوره .

مفوووم!

تمام .

اي اللي محتاجه منك :-

لازم تكون قدام عميلك مختلف عن كل الناس اللي بتقدم نفس خدمتك تكون شغال بنظام واضح ، عميلك يوصله انه بيتعامل مع خبير في المجال مش حد هااااوي وخلاص . 

ديما خلي عميلك يحس بقيمة كبيرة وهو بيطلب خدماتك ، فكر في مشاكل العميل وابتكرلها خدمات جديدة تكون منفرد بيها في مجالك . 

طبق النقاط اللي عرفتها انهارده واستناني في نشرتنا الجايه

علشان هنتكلم عن انواع المحتوى 

لو لسه جديد في المجال تقدر تستفيد من ورشة تطوير المعلق الصوتي في 3 شهور ... تدريب عملي على انواع كتير من النصوص هدفها نقل مستواك من حالة المبتدئ لمستوى الأحتراف وكمان تعرف نقاط القوة والضعف في صوتك .