استهدف عملائك بذكاء

اكيد سمعت كتير عن التسويق بالمحتوى وكتير من المتخصصين بيكلمك ويقولك سوق بالمحتوى سوق بالمحتوى وانت للأسف فاهم التسويق بالمحتوى بشكل غلط تماما .

تعريف بسيط للتسويق بالمحتوى 

التسويق بالمحتوى باختصار هو انك تقدم محتوى جذاب تستهدف بيه عملائك بطريقة غير مباشرة علشان ينفذوا شغل معاك وتقدر تحقق الغرض التسويقي الخاص بيك .

خطأ شائع في فهم التسويق بالمحتوى 

معظم المعلقين الصوتيين فاهمين التسويق بالمحتوى هو انك تسجل فيديوهات تشرح فيها تعليق صوتي وللأسف ده مفهوووم غلط تماما لانك ببساطه مش بتسوق لنفسك كمعلق صوتي انت بتسوق لنفسك كمدرب . لان ببساطة عميلك مش هيدخل يتعلم تعليق صوتي ولا هيهتم بنوع المحتوى ده .

نقط مهمه جدا 

• لازم تتاكد ان مستواك مؤهل لنشر خدمتك

يعني بكل بساطه تكون واصل للحد المقبول اللي تقدر من خلاله تقول انك معلق صوتي ومتمكن من خدمتك اللي هتقدمها . طبعا انا عارف انك بتفكر دلوقت وبتسأل نفسك هل انا مؤهل ولا لا ؟ 

هقولك بكل بساطه لو انت لسه مبتدأ (( يعني لسه مخلص كورس مع اي مدرب او عندك خلفية كبيرة عن المجال اكتسبتها اونلاين )) فانت محتاج تدريب عملي لفترة اكبر وده بنقدمه لكل متابعين نشرتنا البريدية . التدريب ده بيكون عبارة عن ورشة عمل مدتها 3 شهور تقدر من خلالها ترفع مستواك اكتر بحيث تكون قادر تنزل سوق العمل وانت مؤهل .

عارف انك عاوز تنضم للورشة العملية دي بس قبل متفكر في الانضمام لازم تكون واخد قرار صارم مع نفسك انك تكون ملتزم خلال الفترة دي علشان تستفيد منها بشكل كبير .

عارف بردوا ان في كتير منكم حاسس انه مش محتاج تدريب وموجود في المجال من فترة ومحتاج يقيم مستواه .متقلقش جهز عيناتك الصوتية الجملية واحجز استشارة وهكون معاك نحدد كل نقط القوة والضعف واي كل حاجه نقصاك بحيث تقدر تشتغل عليها بشكل قوي وتطور نفسك اكتر .

• لازم تكون ماشي بخطه وليك هدف واضح 

الطبيعي اي حد ناجح مش بيكون ناجح بالصدفه .. لازم تكون راسم طريق لنفسك وعندك هدف ملتزم بيه قدام نفسك وتعمل المستحيل علشان تحققه .

• لازم تهتم بالمجال نفس اهتمامك بدراستك وشغلك 

خليك فاهم ديما انه على قد مجهودك هتلاقي مقدار النجاح اللي تستحقه ، لو محتاج توصل في اي مجال في الدنيا وتحقق منه الدخل اللي نفسك فيه لازم تبذل مجهود كبير في سبيل تحقيق هدفك . واعرف ديما قد مهتشوف المجال ده كبير ويستحق منك وقت قد مهتلاقي نجاح كبير فيه .

خلاصة التسويق بالمحتوى 

علشان تعمل محتوى قوي فعلا يستهدف عملائك لازم تحط نفسك مكان عميلك وتسأل اي اللي يخلي العميل يشتغل معاك ، اي الحاجه اللي العميل محتاج يشوفها علشان يقتنع بيك .

لما تعرف عميلك بيفكر ازاي ومهتم بأيه هتقدر توصله وتحقق هدفك التسويقي من محتواك 

مثــــال على الأفكـــار

فكرة ان العميل يشوف شغلك ويقتنع بيه من خلال تصوير كواليس لكل شغلك تعرض اعمالك ومشوارك علشان تطلع تسجيل واحد احترافي وقد اي الموضوع محتاج تركيز ودقه وعلم وتحليل ومجهود .

دي فكرة بسيطه عاوزك تفكر كتير هتلاقي بدل الفكرة 100 فكرة تظهر بيها لعملائك وتقنعهم بيك بطريقة غير مباشرة وتخليهم هما اللي يطلبوا منك تعملهم شغل وتاخد اتعابك اللي تستحقها .

لو استفدت من نشرة انهاردة متنساش تشاركها مع اصدقائك