تصميم الجرافيك: دليلك الممتع لفهم أساسياته وأنواعه وتأثيره في حياتنا

عالم تصميم الجرافيك: لغتنا البصرية اللي حوالينا

لو بصيت حواليك دلوقتي هتلاقي تصميم الجرافيك في كل مكان حواليك  بداية من غلاف كتاب أو في إعلان على إنستجرام أو في لافتة شارع أو حتى في شكل زرار "إحجز الآن" على موقع ما ..  التصميم هو اللغة اللي بنشوفها من غير ما نحتاج نقرأها هو لغة بصرية بتوصل فكرة أو رسالة مباشرة لعقلنا و تخاطب وعيك وإدراكك.

التصميم مش مجرد أشكال وألوان حلوة و صور .. بالعكس هو أداة قوية جدا للتواصل لأنه يقدر يخليك تختار منتج معين لمجرد إن تغليفه شدك ولفت إنتباهك أو يخليك تتحمس تتبرع لحملة خيرية بعد ما تشوف إعلان مؤثر ليها أو إنك تبطل عادة سلبية بسبب إعلان بيتكلم عن أضرارها أو مثلا لوحه إرشادية للإنقاذ تقدر تنقذ حياة حد إلى آخره من أمثلة.

ما هو تصميم الجرافيك ؟

هو فن توصيل الأفكار والمعلومات عن طريق عناصر مرئية. يعني مصمم الجرافيك بيختار الألوان و الخطوط والصور والترتيب… كل ده عشان يخلي الرسالة أوضح وأجمل وأكثر تأثيرًا عشان كدا المصمم يعتبر مترجم بياخد الفكرة (على شكل نص) من العميل، ويحطها في صورة أو شكل يخلي الناس تفهمها وتحسها بمجرد رؤيتها.

وبكدا نقدر نقول إن تصميم الجرافيك هو شكل من أشكال التواصل البصري بيستخدم لتوصيل رسالة او معلومة لجمهور محدد و يتم تمثيلها بصرياً بالإعتماد على إنشاء عناصر مرئية و إختيارها وتنظيمها لإضفاء معنى أقوي و أعمق إلى الرسالة المطلوبة مع تبسيطها للجمهور.

بنقابل تصميم الجرافيك فين ؟!

الجواب: في كل مكان! وخليني أبسطها لك في شوية مجالات رئيسية:

• تصميم الإعلان (Advertisement): زي الإعلانات التلفزيونية، البوستات على السوشيال ميديا، اللوحات في الشوارع… الهدف هنا يقنعك، يشجعك، أو يخليك تتحرك.

• تصميم العلامة التجارية (Branding): من أول اختيار اسم البراند، لحد اللوجو، الألوان، طريقة التغليف… كلها عناصر بتخلي الناس تفتكرك وتثق فيك.

• تصميم الهوية البصرية (Identity Design): دي الشخصية البصرية الكاملة لأي براند: اللوجو، الورق الرسمي، الخطوط، وحتى شكل الموقع.

• تصميم الاتصالات المؤسسية (Corporate Communication): الشركات الكبيرة محتاجة تتواصل مع موظفينها وجمهورها في نفس الوقت. زي الكتيبات، البروشورات، التقارير السنوية، أو مواقع الشركات.

• التصميم البيئي (Environmental Design): زي اللافتات في المولات، المتاحف، المعارض، أو أي مكان محتاج نظام إرشاد بصري.

• تصميم المعلومات (Information Design): لو شفت إنفوجرافيك، خريطة مترو، أو رسم بياني واضح… ده شغل مصمم جرافيك بيرتب المعلومات بطريقة سهلة وممتعة.

• التصميم التفاعلي (Interactive Design): المواقع، التطبيقات، الألعاب، وحتى الشاشات اللي بنتعامل معاها يوميًا.

• تصميم الرسوم المتحركة (Motion Graphics): عناوين الأفلام، الفيديوهات الإعلانية، أو أي تصميم "متحرك".

• التصميم الترويجي (Promotional Design): من الملصقات لأغلفة الكتب، للدعوات والإعلانات. الهدف: يروج لمنتج أو فكرة.

• تصميم النشر (Publication Design): الكتب، المجلات، الجرائد، النشرات الإلكترونية… كلها محتاجة مصمم يعرف يقدّم المحتوى بشكل يجذب القارئ.

• تصميم الخطوط والنصوص (Typographic Design): الخطوط مش مجرد كتابة، دي فن كامل. فيه مصممين شغلهم الأساسي تصميم الحروف والخطوط الجديدة.

ليه تصميم الجرافيك مهم ؟

لأن التصميم مش بس بيفرق في شكل الرسالة هو بيفرق كمان في تأثيرها و كمثال إعلان مصمم بشكل احترافي ممكن يغير سلوكك سواء الشخصي أو الإقتصادي أو الشرائي إلى أخره .. كمثال آخر لوجو قوي يخلي البراند راسخ في ذهنك زي أبل و مرسيدس و غيرها من شركات كبيرة .. و كمثال آخر تقرير ممل ممكن يتحول لحاجة ممتعة تقرأها بسبب تصميم ذكي وتفضل فاكره و يأثر في نجاح مشروعك .. عشان كدا نقدر نقول إن بإديك و تميزك توصل رسالة تغزو القلب و العقل و تثبت في وجدان الجمهور المستهدف.

و أخيراً التصميم شغل جماعي و مبني على التعاون

رغم إن المصمم هو "المخرج البصري" للفكرة، بس الشغل دايمًا بيكون تعاوني. بتشتغل مع مبرمجين و كُتاب و مصورين و مخرجين وشركات بتبني ليها هوية بصرية او محلات بتصمم ليها اعلانات .. وكل واحد ليه دور في خروج العمل النهائي بشكل متكامل يوصل الرسالة المطلوبة للجمهور المستهدف.

نصيحة غالية للمبتدئين:

المجال واسع والفرص فيه كبيرة، ومهم أطمنك إن موضوع "الذكاء الاصطناعي هياخد مكان المصممين" ده مجرد وهم. الذكاء الاصطناعي في النهاية أداة، محتاج مبدع يعرف يوجّهها ويستغلها صح، وده دورك كمصمم. هو هيخدمك ويسهّل شغلك، لكن عمره ما هيستبدلك.

فرص الشغل قدامك متوفرة في مجالات كتير:

• استوديوهات التصميم
• شركات الإعلان
• وكالات التسويق الرقمي
• دور النشر
• أو حتى تشتغل كـ Freelancer من بيتك

ولو إنت لسه مبتدئ، أنسب خطوة تبدأ بيها إنك تشتغل مع فريق أو شركة. كده هتتعلم أسرار المهنة، وتكسب خبرة عملية هتفتحلك أبواب كتير بعد كده. ومع الوقت هتكتشف إيه أكتر مجال بيمثلك: هل هو الإعلانات؟ الهوية البصرية؟ ولا تصميم النشر؟

كمان ما تنساش تتابع الفعاليات وورش العمل الخاصة بالمصممين، وارتبط بمنظمات أو مجتمعات تصميم سواء محلية أو عالمية. ده هيساعدك تفضل مطّلع على الجديد وتبني شبكة علاقات مهمة تقوي مسارك المهني.

الخلاصة:

تصميم الجرافيك مش مجرد "شغل فوتوشوب" لا خالص .. التصميم هو لغة العصر اللي بتوصّل الأفكار وتبني البراندات وتغير سلوك الناس ومهما كان مجالك أو اهتمامك، هتلاقي مجال من مجالات تصميم الجرافيك يناسبك.

الخاتمة

لو وصلت لحد هنا، أحب أقولك رسالة صغيرة: أنت على الطريق الصح 👏. محاولتك للتعلم والبحث هتوصلّك للي بتتمناه مهما طال الطريق. استمر في تطوير نفسك، سواء من هنا أو من أي مصدر بتثق فيه. شكرًا جدًا لوقتك، وبتمنى تكون لقيت في المقال ده قيمة تضيفلك. 🌿

التواصل

X (Twitter) حسابي الشخصي

للتواصل و الإنضمام لمجتمع المصممين الخاص بنا يمكنك من خلال الروابط الآتية:

📌 جروب الواتساب الرسمي:

جروب فيه مجموعه مصممين من جميع المستويات لمساعدة بعض بالخبره

WhatsApp Group Invite

📌 قناة التيليجرام الرسمية:

Telegram: View @Graphic_Designers_Global

💬 جروب المناقشة التابع للقناة:

Telegram: Contact @Graphic_Design_GC

🎁 Art Box by Ehab Salah Art:

Telegram: View @ArtBox_By_EhabSalahArt