ليش قررت غير

ليش قررت أغير؟

كنت ماشية بطريق واضح…الكاريزما، الظهور، الحضور، كيف نخلي الناس تحبنا وتنجذب لنا…

كنت عم أشتغل من قلبي، والنتائج حلوة.بس… في شي داخلي كان عم يناديني.

في لحظة، كل شي وقف.صرت اسأل حالي:"أنا عن جد عم أحكي عن الكاريزما… بس عن أي كاريزما؟كاريزما المظهر؟ ولا كاريزما الإنسان اللي واجه الحياة، وضل واقف؟

"أنا وحدة من نساء فوق الأربعين.مرّيت بكتير تغيّرات…فقد، تعب، صمت، إعادة بناء…وصار عندي يقين أنه الكاريزما الحقيقية بتبدأ من جوّا.

من بعد ما تكسّرك الدنيا شوي… وتروّقك شوي…وتورجيك مين إنتِ فعلاً.لهيك…

قررت أرجع للجوّا. أحكي مع النساء اللي متلي… اللي كانوا دايمًا يدعموا الكل، ويهتموا بالكل… ونسيوا حالهم. اللي صحيوا فجأة وقالوا:"أنا؟ بدي اعيش لإلي شوي.

"تغييري مو انسحاب.تغييري هو رجعة لحالي…ولكل وحدة بتحس إنها "تأخرت" بس هي بالحقيقة…بلّشت توصل.

يمكن لاحظت أنه هي أول مرة بكتب بالعامية , بصراحة , هي كمان آخر مرة , ولكن حبيت أني أحكي معك أنت باللي بقلبي بعيداً عن الرسميات والفصحى , حبيت وصلك فكرة أنه أنا هون لدعمك وأنا هون لأسمعك , وأنا هون , لأشتغل معك أنت كمان لتصيري أقوى وتكتشفي أفضل ما فيك , 

الرسالة هي رسالة استثنائية  لأنها ما رح توصلك يوم الأربعاء مثل العادة , ولكن هي الرسالة كتبتها فقط لخبرك عن التغيير اللي عملته وليش عملته 

الرسائل القادمة , فقط بالفترة الأولى وبسبب ضغط العمل - ويمكن لاحظتي أنه انقطعت فترة عن إرسال الرسائل - رح تكون كل 15 يوم  بدل ما تكون أسبوعياً 

وما تنسي تتابعيني على حساباتي على السوشال ميديا , لتتعرفي على أفضل الطرق لتبدي من جديد نسختك الأوعى